Грција во октомври ќе оди на нови предвремени парламентарни избори, најавуваат грчките медиуми. Според нив, премиерот Андонис Самарас ја подготвува опцијата за предвремени избори како план за владини промени и се очекува да ја објави во следните денови. Октомври е месецот на избори, а штабови отсега се на “борбена нога”, пишуваат грчките весници, навестувајќи дека е можно новата владина коалиција да ја формираат конзервативната Неа Демократија и радикалната левица Сириза. Доколку најавите на грчките медиуми се исполнат, тоа би можело да значи и  ново одлагање и подолг застој во разговорите за името. Медијаторот Метју Нимиц чекаше во Македонија да завршат претседателските и парламентарните, а потоа во ГРција европските избори за да најави нова посета на регионот летово. Сепак, неизвесно е што ќе се случи доколку Грција уште еднаш влезе во предизборие.