Транспортниот сектор ја има клучната улога во развојот на регионалната економија и секое ограничување на работењето на превозниците ќе има негативно влијание врз целиот регион во Западен Блакан, изјави вицепремиерот Александар Николоски, кој денеска во рамки на работната посета на Загреб се сретна со Лука Буриловиќ, претседател на Стопанската Комора на Хрватска.
„Средбата е од големо значење заради потенцирање на проблемот со македонските превозници, односно превозниците од земјите од Западен Балкан, а се со цел обезбедување на силна подршка од бизнис комората на Хрватска и изнаоѓање на соодветно решение во рамки на ЕУ, како би се надминал проблемот со електронската евиденција и работната активност во шенген зоната. Ваквата состојба претставува сериозна закана за економската стабилност и развој доколку не се изнајде решение“, порача Николоски.
На средбата се разговараше и за зголемување на трговската размена и поголема соработка меѓу компании од двете земји.
„Навистина ми е драго што денеска сме во посета на Стопанската комора на Хрватска една респектабилна институција која има огромна традиција и навистина ми е драго што Комората е добар мост за соработка меѓу компаниите во двете држави. Ние имаме одлична соработка, политчките односи се на највисоко ниво и тие односи мора да бидат следени со интензивни економски односи и затоа е значајно да се искористат двете стопански комори, да се спојат двете стопанства и бизнисите да соработуваат меѓу себе. Во таа насока се надевам дека трговската размена ќе расте, се надевам дека ќе достигнеме до половина милијарда евра, а во перспектива да таргетираме и до 1 милијарда евра размена. Она за што зборувавме и големиот проблем што го засега целиот регион, а се однесува за превозниците. Информирав за состојбата за Македонија и регионот и се надевам дека ЕУ ќе изнајде решение се со цел да не се третираат професионалните возачи како туристи или мигранти, да се третираат како професионалци и на тој начин да можат да ја вршат својата работа. Се различно од ова ќе значи сериозен удар не само за македонската и регионална економија туку и врз економијата во цела Европа, имајќи предвид дека бројни компании се извозно ориентирани и извезуваат, а исто така и бројни компании во рамки на ЕУ ги користат нашите производи. Апелирам уште еднаш и го поддржувам протестот на превозниците, да ова прашање се реши што поскоро и од 10 април да немаме проблеми за превозниците“, изјави Николоски..
Добрата економска соработка меѓу двете земји бележи околу 330 милиони евра.
