Агенцијата за млади и спорт за проценетата вредност од 200 милиони денари без ДДВ сакала да изгради 14 пливачки базени, по што тендерот бил поништен затоа што операторите можеќе да понудат најмалку три и пол пати повисока цена од таа што се нуди.

Ова го наведува Центарот за граѓански комуникации како типичен пример за поништена јавна набавка кога договорниот орган направил лоша проценка. Ова е наведено во објавениот извештај за првата половина од 2019.

„Добиени се 9 понуди, од кои 5 ги исполниле поставените стандарди за докажување на способноста на фирмите и се поканети на е-аукција. По спроведеното негативно наддавање, најниската цена изнесувала 688 милиони денари“, се вели во извештајот.

Сосема е вообичаено да се јавуваат разлики во однос на проценетата вредност на тендерите и добиените понуди, но секако не е нормално кога таа разлика ќе изнесува 1 : 3.44. Ваквата разлика секако говори дека договорниот орган направил исклучително лоша проценка. 

„Во мониторираните тендери имаше и други примери на поништување поради несоодветноста на понудите (биле повисоки од проценетата вредност), но кај нив разликата не беше толку значајна и ова отвора друго прашање – дали соодветно се применува членот 77 став 5 од Законот за јавни набавки: Доколку во текот на постапката за јавна набавка, најповолната понуда е со цена повисока од износот на средства утврдени со одлуката за јавна набавка, договорниот орган може да ја измени одлуката и да дообезбеди средства потребни за реализација на договорот, под услов врз основа на спроведена анализа да утврди дека истото е економски поисплатливо од повторување на постапката и понудената цена да не го надминува вредносниот праг за видот на постапката согласно со овој закон“, се додава во извештајот.