Нигерија отпушта 20.000 вработени кои биле на државен список, со цел да заштеди. Од Министерството за финансии на Нигерија велат дека со овој чекор ќе заштедат милиони долари. Државата е принудена да штеди затоа што се намалуваат парите во државната каса поради падот на цените на нафтата. „Кастрење на трошоците за персонал е клучот за финансирање на дефицитот во буџетот за 2016 година, а со заштедата на крајот ќе се намали износот што треба да биде позајмен"- објасни Фестус Аканби, советник во Министерството за финансии. Нигерија објави рекорден буџет во декември, ветувајќи дека ќе го стимулира растот и изградбата на инфраструктура во богатата со нафта, но увозно зависна земја. Државата воедно се стреми и кон искоренување на корупцијата.