На Германија моментално ѝ недостасуваат најмалку 120.000 возачи на камиони, а многу транспортни компании сè повеќе ги откажуваат испораките затоа што немаат доволно возачи, изјави за медиумите Дирк Енгелхарт, портпарол на Федералната асоцијација за патен транспорт.

Според него, помеѓу 30 и 35.000 возачи на камиони се пензионираат секоја година, а само 15 до 20.000 нови се појавуваат како замена за нив, објавува „Шпигел“.

Многу превозници повеќе не учествуваат на тендери бидејќи приходите од очекуваниот транспорт на стоки нема да ги покријат трошоците, кои, како што објаснува Енгелхарт, се зголемиле над просекот поради недостигот на возачи.

Овој феномен веќе има видливи последици, па празните полици што често се гледаат во продавниците не се само резултат на неможноста на синџирот супермаркети и добавувачите да се договорат за цената, туку и на недостатокот на возачи на камиони што ја транспортираат стоката.

Во Германија, 80 проценти од стоките се транспортираат по пат, според „Шпигел“.

Здружението на патни превозници не очекува оваа криза да биде ублажена со таканаречени автономни возила кои се движат со помош на сензори, камери и вештачка интелигенција, без возач зад воланот.

Возачите на камиони веројатно ќе останат незаменливи бидејќи тие се истовремено во улога на придружба и чувар на стоката што им е доверена, пишува весникот.

„Тие се одговорни за предавање на товарот на примачот, како и за неговиот безбеден транспорт“, рече Енгелхарт, така што во догледна иднина возачите на камиони ќе останат единственото решение во случај на непредвидена ситуација.