Интернет игри на среќа ќе започнат да се организираат во Македонија кон крајот на март или почетокот на април. Ќе ги организира нов субјект - Државната видео лотарија, која ќе се формира од двајца партнери - „Австрија казино“ и Државната лотарија на Македонија. „Австрија казино“, која беше избрана на меѓународен јавен повик за привлекување странски капитал, во проектот ќе вложи шест милиони евра, додека Државната лотарија на Македонија ќе има 51% од сопственоста во новиот субјект. „Република Македонија преку Државната лотарија на Македонија нема да има никаков финансиски трошок во поглед на реализацијата на проектот, туку ќе го пренесе правото на организација на игрите на среќа. Приватниот партнер ќе има обврска да инвестира шест милиони евра кои ќе бидат наменети за сите потребни активности кои би воделе кон профункционирање на друштвото“, вели владиниот портпарол Александар Ѓорѓиев.

Државната видео лотарија уште следната недела се очекува да биде впишана како правен субјект во Централниот регистар по што во наредните 60 дена ќе бидат завршени и останатите работи за организација на овие игри. Откако ќе профункционира, ќе се преземат мерки за да се забрани функционирањето на странските сајтови кои нудат вакви игри на среќа.

„Со реализацијата на овој проект ќе се остварат поголем број цели. Ќе има поголема регулација на самиот систем за регулирање на интернет игрите, но она што е поважно е дека повеќе нема да има одлив на значителни милионски суми надвор од Република Македонија. Ќе останат овие средства што се одлевале во државата со што ќе се обезбедат дополнителни средства за спортот, екологијата, здравството и ранливите групи кои во дел се финансираат и од средства кои се собираат по основ на давачки од игрите на среќа“, подвлече Ѓорѓиев.

Според направените анализи, досега од Македонија по основ на интернет игрите на среќа се одлевале по неколку милиони евра секоја година.