Австралија се соочува со сериозен притисок врз енергетскиот сектор, откако растот на цените на горивата и глобалните тензии на Блискиот Исток предизвикаа страв од можни нарушувања во снабдувањето со нафта.

Меѓународната агенција за енергија (IEA) издаде предупредување и апелираше до граѓаните да го намалат движењето и, каде што е можно, да работат од дома. Причината е наглиот скок на цените – дизелот веќе достигна рекордни нивоа од околу три долари по литар.

Во рамки на препораките, IEA предлага низа мерки за намалување на потрошувачката:

работа од дома каде што е возможно

намалување на брзината на автопатиштата

користење јавен превоз наместо приватни возила

делење превоз (carpooling)

избегнување на авионски патувања кога постојат алтернативи

Дополнително, се разгледуваат и мерки како системот „пар-непар“ за возење во големите градови, со цел да се намали сообраќајот и потрошувачката на гориво.

Во Австралија, цените значително варираат – најевтин бензин се продава во Перт за околу 2,19 долари по литар, додека во Мелбурн достигнува и над 3 долари. Националниот просек моментално изнесува околу 2,45 долари по литар.

Премиерот Ентони Албанезе изјави дека овие препораки не се наменети само за Австралија, туку се дел од глобален апел за рационализација на потрошувачката. Тој нагласи дека засега нема недостиг на гориво, туку проблеми во дистрибуцијата.

Сепак, властите предупредуваат дека постојните резерви би можеле да се намалат до крајот на април, доколку кризата продолжи. Владата веќе донесе итни мерки, дозволувајќи координација меѓу нафтените компании за да се обезбеди стабилно снабдување.

И покрај сериозноста на ситуацијата, властите засега ја исклучуваат можноста за воведување рестрикции, но апелираат граѓаните да не создаваат непотребни залихи.

Ситуацијата останува неизвесна, а развојот на настаните на глобалниот пазар на енергенси ќе биде клучен за тоа дали ќе следуваат построги мерки.