Извршниот директор на JPMorgan Chase, Jamie Dimon, предупреди дека потенцијален конфликт со Иран може да предизвика нов бран на инфлација и да ги натера централните банки на драстично зголемување на каматните стапки.

Во своето годишно писмо до акционерите, Димон посочува дека наместо намалување, инфлацијата повторно може да почне да расте, што би значело поскапи кредити за граѓаните и компаниите, токму во период кога се очекува економско закрепнување.

• - Инфлацијата може да се движи нагоре, што ќе доведе до повисоки каматни стапки од оние што пазарите ги очекуваат. Тоа би делувало како „гравитација“ врз цените на имотот и може да го намали расположението кај потрошувачите - наведува Димон.

Тој оценува дека глобалната економија е поотпорна од порано, но предупредува дека постојат бројни ризици кои може да се преклопат и да доведат до „преломна точка“. Меѓу нив се растот на цените на енергенсите и нарушувањата на енергетските пазари.

Според него, војните во Украина и потенцијалниот конфликт со Иран имаат пошироко влијание врз светската економија, особено преку растот на цените на енергијата. Овие шокови, како што вели, не се ограничени само на нафтата, туку влијаат и на други производи како ѓубрива и индустриски гасови.

• - Поврзаноста на глобалните синџири на снабдување веќе предизвикува нарушувања во различни индустрии, од бродоградба до производство на храна - истакнува Димон.

Тој додава дека трговските политики и глобалните тензии дополнително ја зголемуваат неизвесноста, а долгорочните последици од промените во економските односи тешко може да се предвидат.

Во однос на економските стимули, Димон ги издвојува мерките на администрацијата на Donald Trump, како и зголемените инвестиции во вештачка интелигенција, кои можат да придонесат за економски раст, но и за дополнителен инфлаторен притисок.

Тој предупредува и на ризици во секторот на приватното кредитирање, наведувајќи дека иако не се очекува системски ризик, евентуален кредитен циклус може да донесе поголеми загуби од очекуваното.

• - Растот е дел од решението за речиси сите наши проблеми - заклучува Димон.