Откритието на научниците на границата меѓу Невада и Орегон би можело значително да го промени балансот на моќ на пазарот за една од најбараните компоненти на модерните батерии.

Денес, литиумот е еден од најбараните хемиски елементи бидејќи може да се најде во речиси сите батерии што се полнат - од оние за паметни телефони до оние за автомобили.

Сепак, резервите на литиум не се рамномерно распределени низ целиот свет. Земјите што ги имаат овие залихи се во подобра позиција од другите, и според сè, во иднина, поседувањето литиум ќе биде уште поважно.

Затоа не е изненадувачки што научниците ширум светот бараат сè уште неоткриени резерви на литиум, а едно од најголемите наоѓалишта би можело да се наоѓа на донекаде необично место - закопано под древен вулкански кратер.

Нова студија, објавена во списанието Science Advances, открива дека најголемото наоѓалиште на литиум во светот би можело да се скрие на границата на американските држави Невада и Орегон. Научниците веруваат дека под површината би можело да има доволно литиум за следните неколку децении. Се проценува дека калдерата Мекдермит би можела да содржи околу 20 до 40 милиони тони литиум, што по сегашни цени би можело да вреди речиси 1,5 милијарди долари.

Научниците истакнуваат дека локацијата се наоѓа во голем вулкански кратер создаден со колапс на магматска комора и зафаќа површина од 45 x 35 километри.

Во зоната наречена Такер Пас, глината богата со калиум, која цврсто се врзува за литиумот, формира слој дебел околу 30 метри. Анализите покажаа дека оваа глина може да содржи околу 1,3 до 2,4 проценти литиум, што е околу двојно повеќе од типичните наоѓалишта, објави Б92.

Дополнителните истражувања покажаа и дека висококвалитетен слој на литиум се наоѓа блиску до површината, што би овозможило експлоатација во големи површински рудници, наместо во длабоки рудници.

foto Wikipedia/Dnn87