Цените на нафтата паднаа вчера по информациите дека Саудиска Арабија е подготвена да го зголеми испумпувањето на сурова нафта доколку руското производство значително падне поради нафтено ембарго на Европската унија.

Референтната меѓународна цена на нафтата Брент падна за 2,30 отсто на 113,6 долари за барел, а американската нафта WTI падна за 2,48 отсто на 112,4 долари за барел во тргувањето до 124,23 часот по локално време, покажуваат податоците на порталот за цени на нафтата.

„Фајненшл тајмс“ (ФТ) претходно објави, повикувајќи се на добро информирани извори, дека Саудиска Арабија е свесна за ризикот од дефицит во понудата и дека „не е во нивен интерес да ја изгубат контролата врз цената на нафтата“.

Соговорниците на ФТ, чиј идентитет весникот не го откри, рекоа дека Саудиска Арабија, која е де факто лидер на Организацијата на земјите извознички на нафта (ОПЕК), не мисли дека има недостиг на пазарот на „црното злато“ за сега.

Во извештајот на лондонскиот бизнис весник се наведува дека се водат разговори за итно зголемување на производството од Саудиска Арабија и Обединетите Арапски Емирати, што би можело да биде објавено на денешниот состанок на ОПЕК +, кој се состои од членки на ОПЕК и нивните сојузници предводени од Русија.

Се додава дека се разгледува можноста зголемувањето на производството планирано за септември да се одложи за јули и август.

Саудиска Арабија претходно ги отфрли повиците од Вашингтон за зголемување на пумпањето над квотата за која како членка на групата ОПЕК + се согласи во рамките на договорот за постепено зголемување на производството.

Ријад се согласи со предлогот за промена на позицијата и зголемување на производството со цел да се смират цените на нафтата, придржувајќи се до барањето на администрацијата на американскиот претседател Џо Бајден, изјавија извори на ФТ запознаени со разговорите.

Саудиските власти дадоа гаранции дека ќе го зголемат производството доколку дојде до криза со снабдувањето на пазарот на нафта, се додава во извештајот.