Трошоците за живот во октомври годинава се зголемиле за 4,1 отсто во споредба со истиот месец лани. Ова е всушност измерената инфлација во десетиот месец годинава откако и на месечно ниво, трошоците за живот се зголемуваа континуирано. Во октомври годинава, цените на мало пак, се за дури 6, 1 процент повисоки од цените во октомври лани, објави Државниот завод за статистика. Според податоците, на месечно ниво растот на трошоците за живот е 0,5 отсто, а цените на мало минатиот месец во споредба со претходниот месец останале на исто ниво. 

Во октомври пораст на индексите на трошоците на животот, во споредба со претходниот месец, е забележан кај шеќерот, џемот, медот, чоколадата и кондиторските производи за 2.5  проценти, маслото и маснотиите за 2.3 отсто, лебот и житата за 1.8 проценти, месото за 1.7 отсто, прехранбените производи и други продукти. 

Во октомври, исто така, пораст на индексите на трошоците на животот е забележан и кај гасот за домаќинствата за 9.2 %, течните горива за домаќинствата за 5.2 %, горивата и мазивата за сопствените превозни средства за 4.3 %, рестораните, кафулињата и слично за 2.0 %, обувките за 1.6 %, домашните услуги и услугите за домаќинствата за 1.5 %, услугите за одржување и поправки на живеалиштето, цврстите горива за домаќинствата, накитот, часовниците и рачните часовници за 1.1 %, градините, растенијата и цвеќињата за 1.0 %, големите и малите електрични апарати за домаќинствата за 0.9 %, чистењето, поправката и изнајмувањето облека, опремата за прием, снимање и репродукција на звук и слики, услугите за рекреација и спорт, услугите за сместување, фризерските салони и центрите за разубавување за 0.8 %, теписите и другите подни покривки, игрите, играчките и хобијата за 0.7 %, текстилот за домаќинствата, електричните апарати за лична хигиена за 0.6 %, материјалите за одржување и поправки на живеалиштето, одржувањето и поправката на сопствените превозни средства за 0.5 %, облеката, мебелот и покуќнината за 0.4 %, актуелните ренти исплатени од станари, резервните делови и приборот за сопствените превозни средства, информатичката опрема за обработка на податоците, другите лични предмети за 0.3 %.

Намалување на индексите на трошоците на животот во октомври 2021 година, во споредба со претходниот месец, е забележано кај свежиот и разладениот зеленчук, освен компирите и другите коренести плодови за 2.9 %, свежото и разладеното овошје за 2.0 %, пивото за 1.0 %, минералната вода, газираните пијалаци, соковите од овошје и зеленчук, виното за 0.2 %.

Исто така, намалување на индексите на трошоците на животот е забележано и кај воздухопловниот патнички транспорт за 13.3 %, туристичките пакет-аранжмани за 6.4 %, велосипедите за 1.3 %, книгите за 1.1 %, другите услуги за опрема за сопствен превоз за 0.4 %, другите апарати и производи за лична хигиена за 0.3 %, моторните возила, домашните миленици и сродните производи за 0.2 %.