Република Македонија за прв пат го претстави својот туристички потенцијал на саемот за туризам што се одржува од 24 до 26-ти јануари во Варшава, соопштија од Агенцијата за промоција и поддршка на туризмот.

Според директорот на Агенцијата,  Јордан Трајков, ова саемско претставување е втор логичен чекор во долгорочниот промотивен план за Полска по минатогодишните средби меѓу македонските туристички агенции и полските тур оператори во Познањ, Варшава и Краков.

„ На саемот се претставивме подготвени, со нови промотивни материјали на полски јазик и пред се, прекрасен штанд. Во рамки на манифестацијата во најфреквентниот период во текот на вториот ден (денеска), заедно со Љупчо Михаиловски, ќе одржиме презентација пред полски тур оператори и новинари. Со ваквиот континуиран, долгорочен настап очекувам да продолжи трендот на зголемување на бројот на полски туристи кај нас, посочи Трајков.

Економскиот промотор за Полска и Унгарија Љупчо Михаиловски потенцира дека Полска е голема земја и е една од ретките во ЕУ која во услови на економска криза имаше растечка економија.

Агенцијата за поддршка и промоција на туризмот ја претставува Република Македонија на четврти саем за туризам оваа година по Холандија, Австрија и Финска, а согласно програмата, до крајот на 2013 година планирани е присуство на уште 17 саеми за туризам низ светот.