Италија се соочува со голем недостиг на работна сила и недостигаат вкупно околу еден милион работници во неколку економски сектори, рече министерката за труд Марија Елвира Калдероне. Главниот проблем е што се повеќе луѓе го напуштаат пазарот на труд поради возраста, а тешко е да се најдат нови работници за пополнување на овие позиции, рече Калдероне.

Владата работи на тоа компаниите да имаат работна сила обучена за работата што ќе ја работат, особено за предизвиците на денешницата, но и иднината, нагласи таа. Ова особено се однесува на еколошката и дигиталната трансформација во светот на работата, додаде Калдероне, истакнувајќи дека главната цел е да се вработи секој граѓанин на Италија.

Земјоделци: Лето ни требаат најмалку 100.000 работници

Недостигот од работна сила е особено изразен во туризмот, велат од здружението „Асотуризам конфесерценти“. Од угостителството се жалат на слабиот одзив на понудите, но и на неквалификациите на кандидатите за работа. Земјоделството во летните месеци и сезоната на жетва има потреба од најмалку сто илјади работници, соопшти земјоделското здружение Колдирети.

Нагласија дека итно им се потребни трактористи, градинари и берачи на овошје и зеленчук. Тие бараат и квалификувани работници во дигиталниот сектор, како земјоделски техничари кои знаат да управуваат со дронови, да читаат метеоролошки податоци и да користат ИТ алатки.