Државата одамна, уште пред Пржино е доведена во недемократска состојба.   Поделбата на власта како минимален демократски принцип е сеуште во сфера  СФ имагинација, бидејќи   “Државата и Партијата” се споиле и станале  едно цело - тоталитарно политичко тело кое ги има узурпирано институциите - оттука тие се девастирани, нефункционални и ексклузивни - ги исклучуваат сите останати - вака доц. д-р Ана Чупеска од Правниот факултет “Јустинијан Први”  ја оценува општествено-политичката состојба во земјава. Политичката криза како што вели очекува да продолжи и во наредните месеци, а очекува и уште поинтензивиран притисок кон   псевдо-егзекутивата на чело со Димитриев  или де факто, Груевски. “Судбината на Пржино, е иста како судбината на сите договори направени со ВМРО-ДПМНЕ. Нема договор, има  само “фолирање. За ова покрај мноштво дуги, сведочат и доказите како, да потсетам – исфрлањето на пратениците од парламентот на 24 декември, изборната измама  во 2011, незаконското прислушување на граѓаните итн, итн... Безбројни се примерите”-смета Чупеска. Аболиција, селективна или неселективна, според неа не би смеело да има, бидејќи  по сите морални и правни предиспозиции таа претставува  цивилизациски исчекор наназад, односно вели  е чиста перверзија. Но, смета дека сеуште постои можност да се санира оваа ситуација, дотолку повеќе што имаме и  отворена подршка од НАТО.  Дипломатите,  додава доц. Чупеска како никогаш до сега, имаат  усогласени  ставови и испраќаат исти пораки. “Се разбира жестоките  и синхронизирани реакции на меѓународната заедница во поглед на “пардонирањето”- и апелот итно аболицијата да се повлече треба да се сватат многу сериозно и соодветно да се постапи. Реакциите се изненадувачки директни. До сега  тие не биле толку директни и  отворени. Индикативно е и зголеменото присуство на т.н. “тешкаши”, што на крајот, кај мене внесува доза на оптимизам  во поглед на разрешувањето на  ситуацијата. А, пораките се јасни - демократизација на земјата мора да има, а селективна правда и култура на неказнивост не смеат да бидат повеќе принцип овде. Во тој правец е и повикот да партиите да се држат до Пржнскиот договор – суштествено, да се поништи аболицицијата, да се овозможи непречена работа на СЈО”-потенцира доц. д-р Чупеска. Уставниот суд кој практично ги отвори вратите за повторно свикување  на Собранието според неа е симптомот кој укажува дека во оваа земја не постои поделба на власта. Доц. Чупеска вели дека  судот неколку пати се прогласи за ненадлежен за круцијални прашања, а кога одлучувале   пак одлучиле   неуставно и антицивилизациски. Оттука, правните последици, треба  да се  анализираат само во светлото на “авторитарниот процедурализам “  кога  преку правото се инсталира неправда, т.е. со правото-правните акти се легализираат илегални активности. Стерилниот легализам, според неа не е решение, туку е проблем. “Па тие го легализираа аболицирањето на изборни измами, Ве молам.Работата на Уставниот суд, едноставно не вреди да се коментира, дотолку повеќе што и со овој таканаречен “преседан” се покажа повторно дека судот  како да работи на далечински управувач, а по  партиски нарачки. Се разбира, со чест на исклучоците во неговиот персонален состав. Институциите на нашиот политички систем се “окупирани”  од Партијата, а на неа, не и одговара  етаблирање на владеење на правото. Оттука, толкав отпор. Луѓето пак  во нив,  се многу уплашени, дека  се под уцени и закани за своите работни места. И клиентелизмот на останатите, исто така контрибуира во оневозможување  на правдата”- смета доц. Чупеска. Во овој правец како што вели  час поскоро треба да се смисли начин како да се санираа “оневозможувањето на правдата”. “Правно-концептуалните предизпозиции се исполнети, како што разбрав со кривичното дело “оневозможување на правда” но мора да сe осмисли и имплементацијата и  гаранциja за  спроведување на ова.  Правото во оваа земја имено е средство за принуда, а не за реализација на правда. Граѓаните ми се чини  нема да се откажат од  правото на протест против нелегитимна власт, иако  овде на власта не и e спорен само легитимитетот  туку и нејзината легална заснованост е сериозно доведена во прашање – за што слушнавме од бомбите на Заев, посебно за изборните измами”- објаснува Чупеска. Незадовоството на  граѓаните кое повеќе од еден месец го изразуваат на улица преку антивладините протести очекува со несмален интензитет да расте и во следниов период.  Очигледно како што вели е  дека на граѓаните им е “преку глава” од селективната правда и од културата на неказнивост. “Убедена сум дека  граѓаните нема да се откажат од протестот и од правото да имаат легална и легитимна власт- која и да е таа. Оттука, што поскоро се вратиме на Пржинскиот процес  и што поскоро се формира техничка или експертска влада толку подобро за сите”-порачува доц.д-р Ана Чупеска од Правниот факултет. С.Б.