МВР поднесе три кривични пријави за оружената престрелка во Кондово, во која повредени беа четири лица. Според полициските информации, инцидентот се случил заради меѓусебна нетрпеливост меѓу браќата Јакупи и Незири. Тие ќе одговараат за „тешки дела против општата сигурност“ и „предизвикување општа опасност“. Иако и од ДУИ потврдија дека повредените биле активисти на оваа партија, за полицијата мотивот на престрелката не е политички. Ова е полициската верзија на случувањата во Кондово: На 24-10-2014 година околу 17:00 часот во село Кондово, поточно пред чајџилницата „Њу лајф“, со возило пристигнале браќата Незири, влегле во чајџилницата, каде биле браќата со кои и претходно имале расправии, по што ги повикале надвор за да ги расчистат меѓусебните недоразбирања. Кога излегле надвор меѓу нив веднаш почнала вербална расправија, а во еден момент сите извадиле пиштоли, испукувајќи повеќе проектили едни кон други. Од испуканите проектили браќата Ј.Ј. и З.Ј. се здобиле со тешки телесни поведи и со приватно возило се пренесени во ГОБ „8-МИ Септември“, а браќата Ќ.Н. и Ќ.Н. се упатиле во непознат правец,  додека еден вработен во чајџилницата, кој се обидувал да ги смири, се здобил со телесни повреди и истиот со приватно возило е  пренесен во ГОБ „8-МИ Септември“. Браќата Јакупи се здобиле со тешки телесни повреди, а браќата Незири со телесни повреди во инцидентот, соопшти МВР. Едниот од семејството Незири бил вработен во МВР и тој во инцидентот употребил службен пиштол. За ова посебна истрага против него отвори и Секторот за внатрешна контрола и професионални стандарди на МВР. Другиот од браќата Незири и еден од браќата Јакупи биле вработени во АРМ.