МВР ги следи социјалните мрежи, каде што се организираа и денешните протести против пресудите во судскиот процес „Монструм“. Притоа полицијата апелира до граѓаните да не дозволат да бидат манипулирани и инволвирани во какви било нарушувања на јавниот ред и мир.

Денешните протести кои ескалираа пред Основниот суд Скопје - 1 завршија со 20 повредени полицајци, неколкумина повредени демонстранти и шестмина приведени.

Полицијата ќе ги анализира и полициските видеа од настанот, по што не се исклучува можноста и од дополнителни пријави.

За прекин на насилството и итно смирување на состојбата денеска апелираше и невладината организација „Цивил“. Од таму ги повикаа и сите политички елити да излезат со заедничка изјава и да преземат итни чекори за смирување на состојбата.

Од партиите засега официјално молк за случувањата на протестите. Но, неофицијално, медиумите на албански јазик јавуваат дека синоќа и денеска претседателот на чаирскиот огранок на ДУИ Бекир Асани, праќал СМС пораки до Албанците во кои советувал да не излегуваат на протести и дека незадоволството од пресудите за Монструм ќе било решено преку институциите.