Бизнис климата во Германија нагло се влоши во април, достигнувајќи најниско ниво од енергетската криза во 2022 година, покажуваат најновите податоци на Центарот за европски економски истражувања (ZEW).

Индексот на економски очекувања, кој ги мери ставовите на финансиските експерти и инвеститори за наредните шест месеци, падна за 16,7 поени, на -17,2, што значи дека очекувањата влегле во негативна зона. Станува збор за втор последователен месечен пад, по веќе значително влошување во март.

– Економските очекувања сега се во негативна зона – предупреди претседателот на ZEW, Ахим Вамбах.

Според него, војната во Иран има сериозни последици врз германската економија, далеку над растот на цените на енергенсите. Компаниите се сè позагрижени за долгорочни нарушувања во снабдувањето со енергија, што ги обесхрабрува инвестициите и го намалува ефектот на државните мерки за поддршка.

Најсилен удар претрпеле хемиската и фармацевтската индустрија, како и производството на челик и метали. Автомобилскиот сектор останува релативно стабилен, но и натаму е во негативна зона, додека градежништвото бележи благо влошување.

Од друга страна, подобрување има во банкарскиот и осигурителниот сектор, како и во информатичката индустрија и комуналните услуги.

Негативниот тренд е присутен и во еврозоната, каде индексот на економски очекувања падна на -20,4 поени. И тековната економска состојба е оценета полошо – индексот во Германија падна на -73,7 поени, додека во еврозоната на -43.

Овие податоци укажуваат дека најголемата европска економија влегува во период на зголемена неизвесност, со потенцијални последици и за поширокиот регион.