Избирачкиот список не смее да биде предмет на партиски договори, категорични се од граѓанската организација МОСТ, јавува Телма.

Според нив, Државната изборна комисија мора јасно и прецизно да објасни, од каде се овие бројки на спорни гласачи, за кои се договараат партиите во Пржино и како дошле до нив.

За МОСТ  е нејасно, дали бројката од 40 000 гласачи кои треба сами да се пријават затоа што во спротивно ќе бидат избришани од избирачкиот список, и оние 170.000 иселеници кои ќе бидат ставени на посебен список, се добиени со административна или со теренска проверка.

За нив е особено спорна теренската проверка. Иако добија овластување да ја набљудуваат теренската проверка, тоа им беше дозволено само во подрачните канцеларии на ДИК, со што им е оневозможен целосен увид во процесот. Дел од подрачните канцеларии не соработувале со нивните набљудувачи и не им давале информации.