Германската авиокомпанија Луфтханза би можела да намали околу 100 домашни летови неделно следното лето поради зголемените даноци и аеродромски такси што ја намалуваат профитабилноста, изјави денес извршниот директор на авиокомпанијата, Карстен Шпор.

„Без намалување на оперативните трошоци во Германија, понатамошните намалувања ќе бидат неизбежни“, изјави Шпор за весникот Велт ам Зонтаг, додавајќи дека се разгледуваат рутите од Минхен до Минстер-Оснабрик и Дрезден, каде што компанијата моментално работи со загуба.

Тој истакна дека државните трошоци за авијација во Германија речиси се дуплирале од 2019 година.

Според него, високите даноци најмногу ги погодуваат билетите во економска класа, додека стапките на зафатеност во повисоките класи се зголемуваат, објави Блумберг.

Германските авиокомпании долго време предупредуваат на високите аеродромски такси.

Рајанер оваа недела објави дека ќе намали 800.000 седишта во зимскиот капацитет во Германија и ќе откаже 24 рути од истите причини.

„Луфтханза“, која се бори да се опорави од падот на профитот, планира да намали околу 4.000 административни работни места до 2030 година.

Во меѓувреме, нејзината нискобуџетна подружница „Дискавер“ планира да ја прошири својата флота за 10 авиони, вклучувајќи четири „А350-900“, за да ја зголеми ефикасноста на летовите на долги релации.

Фото: Принтскрин/Икс