Корупцијата годишно „јаде“ над 2% од вкупното светско богатство, се наведува во најновиот извештај на Меѓународниот монетарен фонд.

„Корупцијата е сложен феномен кој му одолева на времето“, се оценува во извештајот објавен пред денешниот самит за борба против корупцијата во Лондон на кој ќе учествуваат шефови на држави и влади на четириесетина земји.

„Сиромашните земји се најголеми жртви на корупцијата, бидејќи зависат од секторот на јавните услуги“- вели директорката  на ММФ, Кристин Лагард.

На мито секоја година се троши околу 2 илјади милијарди долари, што е еднакво на бруто домашниот производ на Франција, стои во извештајот. Се наведува дека корупцијата поттикнува избегнување на плаќање на даноците и води кон насилства и граѓански војни чии последици се катастрофални и резултираат со трајна макроекономска нестабилност.

ММФ неодамна заради системска корупција ја запре помошта за Украина, Малави и Мали.