Иран би можел да има пристап до 300 милијарди долари средства за реконструкција ако се придржува до мировниот договор што неодамна го постигна со САД. Барем така вели американскиот потпретседател Џеј ди. Венс. Сепак, деталите за договорот засега се оскудни. Од друга страна, претседателот Доналд Трамп наводно ги отфрли овие тврдења за плаќањето, велејќи дека тоа се „лажни вести“.

Венс во понеделник за Си-Би-Ес њуз изјави дека фондот за реконструкција од 300 милијарди долари ќе биде „нешто до кое тие би можеле да имаат пристап. Тој исто така рече дека ќе биде финансиран од Коалицијата на Заливот.

Во понеделник, Трамп рече: „приказната дека САД му плаќаат на Иран 300 милиони долари е лажна вест што ја пласираат демократите“. Тој додаде дека Иран „се согласил никогаш да нема нуклеарно оружје“.

Извештаите од Ројтерс и Блумберг наведуваат дека фондот од 300 милијарди долари всушност постои. Притоа, Ројтерс известува дека „повеќе од половина од таа сума е веќе утврдена“. Покрај тоа, тие велат дека „фондот е дизајниран да обезбеди економски поттик за двете страни да го склучат конечниот договор“.

Ројтерс, повикувајќи се на извор запознаен со договорот, во вторник објави дека станува збор за „приватен фонд дизајниран да започне инвестиции во Иран“.

САД и Иран се исто така недоследни во нивното толкување на мировниот договор, кој би воспоставил 60-дневен период за преговори. Разговорите во овој период веројатно ќе се фокусираат на почувствителни прашања како што е нуклеарната програма на Иран.

Покрај наводниот фонд од 300 милијарди долари, договорот потпишан оваа недела, исто така, би го продолжил прекинот на огнот меѓу САД и Иран и би го отворил Ормутскиот теснец. Тоа е клучен пат за транспорт на нафта, кој двете страни претходно го блокираа.

Американскиот претседател Доналд Трамп ја оправда војната со Иран тврдејќи дека земјата е блиску до развој на нуклеарно оружје.

Од друга страна, тој во вторникот изјави дека збогатениот ураниум на Иран не е „многу вредна работа“. 

Иран постојано официјално изјавува дека не се стреми да развие нуклеарно оружје. И тоа речиси сигурно ќе биде тема за време на 60-дневниот преговарачки период.

Иранскиот министер за надворешни работи, Абас Арагчи, изјави дека претстојниот мировен договор не вклучува нови гаранции во врска со нуклеарната програма на неговата земја.

Со оглед на тоа што многу детали сè уште не се официјално прецизирани, Трамп се соочи со критики од сојузниците откако минатиот месец изјави дека договорот е близу до завршување.