Министерството за култура го објави конкурсот за финансирање проекти од национален интерес за 2015 година. Конкурсите за поединечните дејности од културата за првпат се објавени на 1 септември, наместо во јуни како досега. Новини има и во постапката за аплицирање, па за да им се даде време на заинтерсираните конкурсите овојпат ќе траат 45, наместо досегашните 30 дена. „Како и досега, и во иднина овие конкурси ќе бидат отворени за секој кој аплицира со проект од национален интерес во областа на културата и се однесуваат на локалните установи, граѓански здруженија, невладини организации и други правни и физички лица“, вели министерката за култура Елизабета Канческа - Милевска, појаснувајќи дека секој што е заинтересиран проектот да му биде финансиски поддржан од денеска може да ги подигне апликациите, електронски да ги пополни и да ги приложи во архивата на Министерството заедно со потребната документација наведена во конкурсите. Со посебни решенија Министерството ќе ги известува сите корисници за резултатите од конкурсите, а за одбиените проекти ќе бидат јасно посочени причините. Неприфатените ќе може да поднесат жалба до второстепена државна комисија.