За монструозното убиство на Тијана Јуриќ (15) на убиецот му претстои казна затвор од 30 до 40 години, бидејќи во Србија и во другите европски земји е укината смртната казна, изјавил министерот за правда Никола Селаковиќ, пишуваат српските медиуми.

 Министерот за правда рекол дека казнената политика за тешки убиства е доволно строга и потсетил дека смртната казна во Европа ја има само во Белорусија.

-Некогаш за ваквите кривични дела се изрекувала смртна казна, но како и сите европски земји моравме да ја избришаме од нашиот кривичен законик. Ние како член на Советот на Европа мора да ја поочитуваме Европската повелба која забранува смртна казна - рекол Селаковиќ.

„За да се влезе во Советот на Европа, треба да се ратификува Европкста повелба, а таа ја забранува смртната казна“, изјави тој.

Понатамошниот тек на постапката во врска со ова киднапирање и убиство на девојчето од Бајмок, според зборовите на српскиот министер е во рацете на обвинителството и судот.

 Имено на социјалната мрежа Фејсбук граѓани покренаа петиција за враќање на смртната казна во Србија.

Страницата „Smrtna kazna za ubicu Tijane Jurić“, за десет часа собра повеќе од 50.000 фанови.

- Страницата е основана со цел да стигне до што поголем број луѓе. Срамота е како овој млад живот е одземен а уште поголема срамота е казната која ќе ја добие монструмот. Целта е да се воведе построги казни за извршените дела врз малолетници. На таквите убијци  не треба никогаш повеќе да им се дозволи да шетаат на исти улици со нашите деца - изјавил за српски медиуми администраторот на оваа страница.

Ова не е единствената страница на социјалната мрежа Фејсбук која го поддржува ваквиот став. Страницата „100.000 луѓе кои сакаат смртна казна за убиецот на Тијана Јуриќ“ досега собрала повеќе од 20.000 истомисленици.