Премиерот изјави дека во моментов нема потреба од ограничување на купувањето горива, и покрај зголемената побарувачка и доаѓањето на граѓани од соседните земји кои точат гориво во Македонија. Според него, пазарот засега останува стабилен, а државата располага со доволни количини и резерви.

„Во овој момент имаме апсолутно доволно количини за потребите на граѓаните. Зголемен е конзумот во одредени погранични области со Албанија, со Косово и Србија, како и со Грција, а вкупната потрошувачка е зголемена за околу 10 проценти, бидејќи дел од граѓаните од овие земји доаѓаат и точат гориво кај нас. Нафтоводот е во целосна функција, складовите се полни согласно закон, а државните резерви се околу шеесет дена, така што во овој момент апсолутно нема никаква потреба од таква мерка“, изјави премиерот.

Во продолжение на изјавата, премиерот рече дека Македонија во моментов има пониски цени на горивата во однос на дел од соседството, а како дополнителен показател за стабилност ја посочи и испораката на керозин кон дел од аеродромите во регионот. Според него, актуелната состојба бара внимателно следење, но засега нема сигнал за рестриктивни мерки.

На прашањето каков ефект ќе има зголемувањето на цените на горивата врз инфлацијата, премиерот оцени дека влијание ќе има, но не очекува тоа да биде силно. Во истиот одговор посочи дека Владата интервенира директно од буџетот и најави можност за ново намалување на цените, доколку берзанските движења останат поволни.

„Очекуваме да има влијание, но тоа влијание не очекуваме да биде големо. Треба да ги видиме трошоците за живот како ќе се пресметаат и токму затоа директно од буџетот интервенираме. Наместо привидни намалувања, ние директно го намалуваме товарот што го собира државата, а имаме и други алатки ако кризата ескалира. Според последните податоци, цените на берзите за безоловниот бензин и дизелот се пониски втор ден по ред и ако тој тренд продолжи до петок, можно е веќе во понеделник да има и ново намалување на цената на горивата“, посочи Мицкоски.

Изјавата на премиерот доаѓа во период кога растот на цените на енергенсите повторно ја отвори темата за можен нов инфлаторен притисок. Од пораките што ги испрати, Владата во моментов не најавува ограничувања, туку се обидува да ја задржи стабилноста на снабдувањето и паралелно да го ублажи ценовниот удар врз граѓаните и стопанството.