Министерството за финансии ја обвини најголемата опзициска партија СДСМ за вчера изнесените информации за заемот што Македонија го доби од Светска банка за поддршка на развојот на македонската економија и смета дека со тоа не и нанесува штета само на Владата, туку и на Република Македонија и на Светска банка. „Со заемот во висина од 50 милиони долари ќе се финансираат повеќе клучни реформски активности поделени во четири области: развој на производството со висока додадена вредност, олеснување на преструктуирањето на земјоделскиот сектор, подобрување на ефикасноста на трговската логистика и воспоставување флексибилност на пазарот на труд преку развој на вештини и иновации. Реализацијата на овие мерки ќе придонесе за развој на приватниот сектор и за подобрување на конкурентноста на македонската економија“ соопштуваат денеска од Министерството за финансии и посочуваат дека за нив е несфатливо како од СДСМ можат да се сомневаат во одлуката која Светска банка ја донесе на 29 ноември годинава. Бордот на директори од повеќе од 190 земји членки на  Македонија и даде заем од 50 милиони долари кои се показател за довербата на Светска банка во Република Македонија и квалитетот на економските политики, се вели во соопштението каде посебно се нагласува тоа што заемот е даден во време на криза, а под најдобри можни услови за Македонија со каматна стапка шестмесечен Еурибор, кој во моментот изнесува 0,61 проценти, со рок на отплата од 18 години и вклучен грејс период од 5 години. „Македонија има ниско ниво на долгот од 30,6 проценти и е четврта најниско задолжена земја во Европа. Методологијата по која Министерството за финансии го пресметува долгот на државата е конзистентна со онаа на Еуростат и ММФ. Земјите со сличен рејтинг  како РМ имаат долг во однос на БДП од околу 50 проценти, а мастришкиот критерим изнесува 60 проценти од БДП, појаснуваат од Министерството за финансии. За нив е несфатливо како за СДСМ, Република Македонија со 30 проценти државен долг е презадолжена или дека по динамика на задолжување потсетувала на Грција. Како резултат, додаваат, на внимателната и успешна фискална политика во изминатите четири години Република Македонија најмалку ја зголеми висината на државниот долг како процент од БДП, споредбено со земјите од ЕУ и регионот. Според Министерството за фунансии исто така чудно е и тоа што СДСМ реагира на фактот што од 95-та до 2012 година,  биле земени 14 исти вакви заеми за буџетска поддршка, од кои голем дел во време на владеење на СДСМ. Затоа поднесувањето на 159 амандмани и писмото на СДСМ до Светска банка  го нарекуваат преседан во додегачното работење на Светска банка со Република Македонија  во овие дваесет години.