Маж е убиен во престрелка во Барселона, а шпанските власти водат истрага за случајот. Инцидентот се случил во неделата вечерта, околу 21 часот, во внатрешен двор на станбен блок на улицата „Минерија“, во населбата Зона Франка.

Според шпанските медиуми, жртвата била погодена со повеќе истрели, по што присутни лица се обиделе да ѝ помогнат до пристигнувањето на службите за итна помош и каталонската полиција. Мажот им подлегнал на повредите, а напаѓачот избегал од местото на настанот.

Полицијата трага по сторителот и засега нема информации за приведени лица. Идентитетот на убиениот сè уште не е официјално потврден, но дел од медиумите во регионот, повикувајќи се на шпански извори, наведуваат дека можеби станува збор за српски државјанин.

Ова е второ убиство со огнено оружје на истата улица во последните три недели. На 16 мај, исто така на улицата „Минерија“, бил убиен друг маж, а според La Vanguardia, полициски извори ги раздвојуваат двата случаи.