Во март просечната плата во земјава изнесувала 28.217 денари, јави денеска Државниот завод за статистика. 

Според податоците на Државниот завод за статистика, просечната месечна исплатена нето-плата по вработен во  март 2021 година, во однос на март 2020 година, пораснала за 6,8 проценти.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Уметност, забава и рекреација (17,9 отсто), Дејности на здравствена и социјална заштита (12,3 проценти) и Информации и комуникации (12,1 отсто).

Зголемување на просечната месечна исплатена нето-плата по вработен, во однос на претходниот месец, е забележано во секторите: Рударство и вадење на камен (14,9 отсто), Дејности на здравствена и социјална заштита (5,3 проценти) и Градежништво (4,0 отсто).

Со овој податок се пофалија и од Владата, од каде велат дека континуирано расте просечната месечно исплатена нето плата по вработен. Оттаму додаваат дека практично во март годинава, во однос на март лани, просечната нето плата пораснала за 1.795 денари.