Македонскиот производител на челик Макстил АД Скопје во 2025 година оствари позитивен финансиски резултат, но се соочува со намалени приходи и послабата деловна активност под влијание на глобалните економски движења. 

Според годишниот извештај на компанијата објавен на Македонска берза, Макстил изминатата година работел во услови на нестабилни пазари, зголемени трошоци за енергија и намалена побарувачка на челик, што директно се одразило врз обемот на производство и продажба.

Вкупните приходи во 2025 година изнесуваат околу 7,69 милијарди денари (околу 125 милиони евра), што претставува намалување во однос на претходната година. Најголем дел од приходите се остварени од директна продажба и услуги за преработка, при што приходите од продажба се намалени поради пад на реализацијата на лимови.

Во делот на производството, компанијата бележи благо намалување на обемот, при што се произведени околу 267 илјади тони лимови, додека реализацијата изнесува околу 268 илјади тони, што е исто така помалку споредено со 2024 година. Овие резултати се поврзуваат со намалената побарувачка и завршувањето на одредени поголеми проекти.

Вкупните расходи достигнале околу 7,13 милијарди денари (околу 116 милиони евра), при што најголем дел отпаѓа на трошоци за суровини, енергија и услуги. И покрај притисокот врз трошоците, компанијата успеала да оствари нето добивка од 609,6 милиони денари (околу 9,9 милиони евра), што претставува значително зголемување во однос на претходната година.

Од аспект на финансиската структура, кредитната задолженост на компанијата изнесува 2,71 милијарди денари (околу 44 милиони евра), што е зголемување на годишно ниво, како резултат на зголемени кредитни линии за финансирање на тековното работење.

Компанијата во текот на годината реализирала и инвестиции насочени кон одржување на производствените капацитети и подобрување на енергетската ефикасност, како и вложувања во опрема и безбедност при работа.

Од Макстил посочуваат дека глобалните ризици, вклучително и нестабилноста на пазарот на челик, високите цени на енергенсите и геополитичките случувања, остануваат клучен фактор за идното работење. 

Сепак, очекувањата се дека со стабилизирање на пазарите и обезбедување нови нарачки, компанијата ќе успее да го задржи континуитетот во работењето и да го подобри финансискиот резултат во наредниот период.