Два града од Македонија се најдоа меѓу најзагадените во Европа.

Интернет истражувањето на интернационалната веб страница  www.numbeo.com, покажува дека Битола е најзагаден град во Европа. Податоците покажуваат дека од 63 градови, Битола е на врвот со индекс на загадување од 83,26 и индекс на експоненцијална скала од 154,30.

Како критериуми земени се во обзир загадувањето на воздухот, загадувањето на водите, нездоволството од третманот со сметот, нечистотијата и влијанието на загадувањето во градската средина. За суспендираните ПМ10 и ПМ 2,5 честички кои предизвикуваат белодробни заболувања се посочени високи параметри (ПМ 10 -69 микро грами, а ПМ 2.5 – 40 микрограми).

На второ место по загадување е рангирано Скопје. На трето место е Торино, Италија, четврт Киев, Украина, петта е Барселона од Шпанија. Од балканските градови Сараево е на 14 место, Белград на 21, Софија на 23 и Загреб на 41 место. На дното на листата, како најмалку загаден град е Трондхајм од Норвешка.

Ова не е прв пат да се посочи на зголемената загаденост на воздухот во Битола. И мерењата на амбиенталниот воздух во земјава преку мерните станици многу пати досега го потврдиле истото.

Лани во повеќе наврати им се сугерираше на граѓаните на Битола кога воздухот е особено загаден да не излегуваат ако немаат потреба. Се смета дека РЕК Битола е главниот извор на загадувањето во градот.