Претседетелот Ѓорге Иванов денеска во Ватикан беше примен од поглаварот на Римокатоличката црква папата Франциск.

Иванов, во Рим и Ватикан,  ја предводи македонската државна и црковна делегација по повод чествувањето на Свети Кирил.

На средбата Иванов и Папата размениле мислења од областа на историјата и односите на Македонија и Ватикан.

Куриозитет е што претседателот Иванов беше примен во приватната резиденција на папата Франциск, што се смета дека претставува особена чест.

Во состав на делегацијата се министрите за надворешни работи и за образование и наука Никола Попоски и Спиро Ристовски, архиепископот охридски и македонски г.г Стефан, митрополитот европски господин Пимен, епископот хераклејски господин Климент...

По средбата, што траеше подолго од предвиденото, Папата и Претседателот имаа  и пленарни разговори со државната и црковната делегација. Папата Франциск од македонската држава и од црковната делегација предводена од архиепископот Стефан доби подарок резба Свети Кирил и икона од Богородица.

Покрај средбата со поглаварот на Римокатоличката црква, претседателот Иванов и македонската делегација во Апостолската палата во Ватикан имаше средба со државниот секретар на Светиот престол, монсињор Пјетро Паролин.

Средбата се одржува во годината кога Македонија и Ватикан одбележуваат 20 години дипломатски односи.

Заедничка оценка е дека во изминатите дваесет години е постигнато одлично ниво на заемно почитување и соработка.

Столбови на односите на  Светиот Престол и Република Македонија се Мајка Тереза, Свети Кирил, словенските просветители, како и заедничките заложби за почитување на различностите, христијанските вредности и дијалогот.

Македонската државна и црковна делегација престојува во Рим и Светата столица по повод манифестацијата „Македонија во чест на Свети Кирил“.