На 122 место се најде Македонија според слободата на медиумите во најновиот извештај на „Фридом хаус“. Ова е за две места полошо од претходниот ранг на земјава. Индексот на медиумски слободи во Македонија е 57, економското опкружување е оценето со 19, политичкото со 21, а законското со 14 индексни поени. Според извештајот, кој опфаќа 197 земји, Македонија е во групата „делумно слободни“, а од поширокиот регион полошо од нас котира само Турција, која е означена како неслободна земја. Во извештајот, 122-то место Македонија го дели со Кенија и Конго, a повеќето балкански земји се во групата „делумно слободни земји“, иако котираат подобро од Македонија. На дното на листата, на 197-то место е Северна Кореја, а првото место го делат Шведска, Норвешка и Холандија. Влошување на состојбите со слободата на медиумите се забележува во целиот свет, а особено во земјите на Блискиот Исток. „Само еден на секои шест луѓе во светот има пристап до слободни медиуми“, проценува„Фридом Хаус“.