Македонија ќе добие препорака за преговори во извештајот за напредокот на земјата кон интеграција со ЕУ, пренесуваат агенциите.

Според високи владини извори препораката не била оспорувана, особено откако е започната имплементацијата на Договорот од Пржино и веќе е доделен специјален обвинител.

И оваа година како негативни поени ќе бидат наведени политичкиот притисок врз судството, партизацијата на администрацијата, проблемите со слободата на медиумите, борбата против корупцијата и други.

Сепак нацртот е во процес на изготвување, па се можни промени во неговата содржина.

Во посетата на Скопје минатиот месец, комесарот за проширување Јоханес Хан изјави дека интеграцискиот дух во Македонија воскреснува, но и дека е малку веројатно наскоро да започнат преговори, бидејќи кризата не е целосно завршена, а и спорот за името не е решено.

„Прагматичен сум, треба да одиме чекор по чекор, кризата не е целосно решена. Ако го исполниме договореното, ќе сториме сé за да ги убедиме земјите-членки на ЕУ да ги започнат преговорите. Тоа сепак не се случува за неколку месеци“, истакна комесарот.