Само 14 насто од работниците во Македонија се вработени на определено време и тоа е приближно исто со просекот на Европската унија, кој изнесува 14,3 %, покажуваат најновите податоци што ги објави „Евростат“ за 2017-та. Сепак, оваа споредба треба да се земе како релативна, затоа што невработеноста во нашата земја е многу голема.

На ова поле Македонија е подобра од Шпанија (26,8), Франција (16,8), Хрватска (20,6), Италија (15,5), Кипар (15,4), Холандија (21,5), Полска (26,1), Португалија (22,0), Словенија (17,6), Финска (15,8), Шведска (16,1). Убедливо прв во оваа категорија е Црна Гора со рамно 30 отсто, во Хрватска се дури 20,6, во Турција 13,2, а во Грција ги има 11,4 отсто.

Романија има само 1,2 насто работници со таков статус, Малта со 5,6, Литванија 1,7, Латвија 3,0, Естонија 3,1, додека во Бугарија е 4,4. Тоа се земјите кои се најдобри на ова поле.

Евидентно е дека во изминатите години ваквиот тип на вработување се зголемувал во структурата на вработените, бидејќи во 2016-та тие биле 13,5 насто, во 2015-та нивниот процент изнесувал 12,6,  Најдобар е, откога се води евиденција, во 2006, кога процентот изнесувал 11,8.

Кај мажите тој е доста поголем и изнесува 15,2 насто, додека кај жените е 12,3%.

Што се однесува во категоријата кај работниците до 24 години, вработеноста на определено време е 30,2 насто и овдека просекот е подобар од оној на ЕУ, кој изнесува 43,9%, но и овдека тоа треба да се разбере „условно“ бидејќи невработеноста кај младите е огромна во Македонија.