„Доколку станам советник, тоа ќе претставува огромен успех за мене. Прв пат во историјата на градот Македонец е кандидат за оваа функција, што секако ќе претставува огромен успех за Македонија, но и за нашите луѓе кои живеат во Венеција и околината, вели Љупчо

Македонецот Љупчо Андоновски е кандидат за советник за локалната самоуправа на Венеција и околината. Изборите во Италија ќе се одржат на 31 мај 2015 година.

„Доколку станам советник во градот Венеција и околината, тоа ќе претставува огромен успех за мене. Прв пат во историјата на градот Македонец е кандидат за оваа функција, што секако ќе претставува огромен успех и за Македонија, но и за нашите луѓе кои живеат тука. Станува збор за околу 18 илјади граѓани“, вели Андоновски.

                                                          Г-дин Андоновски на Конгрес

Тој е носител на граѓанска листа за советници за градот Венеција. Андоновски е познат бизнисмен кој поседува златара на плоштадот Сан Марко во Венеција. Во моментов работи како „Ловец на бизниси“ (International Business Gateway) и го советува Митрополитот за Италија и Малта. Поради многубројните добротворни акции, тој добива орден Кавалер (Витез на мирот од ореденот на Малта).

                                                      Г-дин Андоновски и Луиџи Бруниаро 

„Работам и како претседател на невладината организација АНАС Италија за регионот Венеција. Оваа организација се занимава со социјална политика. Поради секојдневните контакти со луѓето, нормално, навлегов и во политичките води. Сега сум претседател на партијaта НЦД (Nuovo Centrodestra) за Венеција, која ја води вице-премиерот и министер за внатрешни работи на Италија, Ангелино Алфано. Сепак, сум носител на граѓанска листата за советници на Венеција, благодарение на мојот труд. Ова значи дека треба да имате огромна човечка и политичка вредност, како и доверба кај граѓаните за да добиете ваква можност. Изборите во општината ќе се одржат на крајот на мај и оттогаш, ќе бидам советник на најбогатиот бизнисмен и иден градоначалник на Венеција, Луиџи Бруниаро“, објаснува Андоновски.

Најважно во животот, за Љупчо, е школувањето кое му го овозможил татко му и дадениот совет „работи, печали и помагај“. Тој сега работи и печали во Италија, каде и е ангажиран во хуманитарни активности. Исто така ја претставува Македонија пред Италијанците и речиси, на месечно ниво, праќа делегации – потенцијални инвеститори во земјава. Тој, заедно со партнер од Италија, инвестира во фабрика за производство на радијатори во Охрид.

                                                        Г-дин Андоновски со Сенатор Марио Дела Торо

„Во Венеција отворив центар за уникатни рачни златарски производи каде носам производи од Македонија. Тука ги продаваме и на тој начин, ја шириме македонската култура во светот. Се разбира, горд сум што успеав и да донесам инвеститор во Македонија. Не застанувам тука, односно се повеќе ќе ја промовирам Македонија и нејзините потенцијали пред луѓето во светот. Апелирам тоа да го прави секој Македонец“, вели Андоновски.

Рамка:

                                          Г-дин Андоновски со икона кај Папата

По повод Светскиот ден на лебот, вчера во Ватикан, нашиот Македонец, Љупчо Андоновски лично му подарил рачно изработена икона на Папата Франциско.

                                         Папата Франциско по повод Светскиот ден на лебот