Речиси половина од македонските граѓани сметаат дека треба да се суспендираат или прекинат преговорите за името под покровителство на Обединетите нации. Анкетата на Македонскиот центар за меѓународна соработка и на Институтот за демократија „Социетас цивилис“ покажа дека расте отпорот во земјава против промена на името. Според анкетата, 62,4 отсто од граѓаните не поддржуваат никаква промена на името, што е пак речиси за 50% повеќе во однос на расположението во 2010-та година. Меѓу испитаниците Македонци, тој процент достига дури 79,7 отсто. Над 70 отсто од анкетираните се противат во преговорите за името да се дефинира дополнително и државјанството, националноста или името на македонскиот јазик. Граѓаните во голема мера не и' веруваат на Грција дека ако се реши спорот нема да бара други отстапки - дури 32,9 отсто немаат доверба кон ваквото ветување на Атина. Кога би морале да избираат меѓу двата приоритети - ЕУ или името, двата најголеми етникуми во Македонија имаат дијаметрално спротивставени ставови. 64,9 отсто од Македонците би го избрале името, а 68 отсто од Албанците евроинтеграцијата, а разликите меѓу нив по ова прашање се поголеми од претходно. Податоците во анкетата се толкуваат како знак дека колку подолга е грчката блокада, толку повеќе во Македонија опаѓа оптимизмот околу решавањето на спорот за името. Според шефот на дипломатијата Никола Попоски, ваквиот тренд е одраз на реалноста, бидејќи граѓаните не чувствуваат вистинска желба кај Грција за постигнување решение со кое двете страни можат да живеат.