Луксузниот бренд Гучи одлучи да овозможи плаќања во криптовалути и за таа цел, кон крајот на овој месец во САД спроведува пилот програма за прифаќање на десет различни дигитални валути. Модната индустрија со месеци експериментира за да се прилагоди на новите реалности на пазарот: NFT, Metaverse и дигиталните валути. Гучи, модна компанија основана во 1921 година од Гучо Гучи во италијанска Тоскана, одлучи да преземе важен чекор кој би можел да ги мотивира и другите брендови во секторот да го сторат истото, пишува Bizlife.

Некои продавници за луксузни брендови во САД ќе почнат да прифаќаат криптовалути во пилот програма во мај во неколу градови: Лос Анџелес, Њујорк, Мајами, Атланта и Лас Вегас.

На крајот на летото, сите бутици на Гучи во САД ќе прифаќаат плаќање во криптовалути. За да извршат плаќање, клиентите ќе добијат QR код преку е-пошта што ќе им овозможи пристап до нивните дигитални паричници.

„Гучи се етаблира како ран усвојувач на Web3 технологии, вклучувајќи го и блокчејнот. „Крипто плаќањата означуваат уште еден чекор за Гучи, кој го комбинира постојното физичко присуство со новите напори на Web3“, објасни компанијата во соопштението.

Клиентите ќе можат да вршат плаќања со користење на десет различни криптовалути, вклучувајќи Bitcoin, Ethereum, Litecoin и Shiba Inu.