Либерално-демократската партија ќе се приклучи на протестот на „Шарената револуција“ вечерва во 18 часот пред СЈО.

Како конструктивна партија, која почива на принципите на демократијата, сметаме дека повикот и оправданоста за еден ваков масовен протест е фактичката состојба во државата, неоправдана и неправедна, во која власта предводена од ВМРО-ДПМНЕ ја втурна Република Македонија, велат од ЛДП.

„Веруваме дека огромно мозинство од нашите граѓани ќе ја најдат причината, неопходноста, зошто мора да се побунат против оваа власт и да го изразат својот протест. Веруваме дека секој еден, после десет години тортура од врхушката на власт, е свесен од каде доаѓа бесот и револтот за овој протест. Затоа вечерва посакуваме сите граѓани да ги видиме на едно место, со силна енергија и јасна порака -доста ни е од оваа криминогена и забегана власт. Во Македонија мора да се врати демократијата и владеењето на правото и конечно, државата да се врати на вистинскиот пат, оној кој води кон ЕУ и НАТО“ - наведуваат од ЛДП.

Веднаш по завршување на протестот, ЛДП ќе одржи состанок на Извршниот одбор, на кој ќе разговара за новонастаната состојба во државата и излезот од политичката криза.