Возачот на автобусот на „Струмица експрес“ заработи кривична пријава за вчерашната несреќа во која автобусот со кој управувал се судри со воз на патот Штип-Велес. Првичната истрага утврдила дека возачот се обидел да ја заобиколи рампата која сигнализирала поминување на возот и со тоа директно ја предизвикал несреќата во која беа повредени над 30 лица. 54-годишниот возач денеска дал исказ пред истражен судија, но се уште не се познати причините зошто се одлучил на ризичниот чекор и ги довел во сериозна опасност патниците. Обвинителството побарало на шоферот да му биде одредена и мерка притвор. Состојбата на повредените патници денеска се подобрува.