Специјалниот известувач на Обединети нации за човековите права на мигрантите, Францис Крепе денеска повика Грција да престане да ги апси децата бегалци и да развие служба за нивна заштита.

Тој се сретнал со деца без придружба држени во полициски станици повеќе од две недели без пристап до надворешниот свет. Тврди дека тие биле трауматизирани и вознемирени од таквото искуство. Крепе вели и дека другите деца заедно со своите семејства се држени во пренатрупани притворски центри.

„Децата не би требало да се затвораат и точка. Притворот мора да се изрече само кога луѓето претставуваат ризик, закана за јавноста и тоа мора да биде документирана закана, тоа едноставно не може да биде претпоставка“ - кажа Крепе.

Бара грчките власти да развијат ефикасен систем за заштита на малолетните лица без придружба и да ги зголемат сместувачките капацитети за нив.