Меѓународата кредиторска тројка (Европската унија, Европската централна банка и Меѓународниот монетарен фонд) побарала отпуштање на сите даночни инспектори од Министерството за финансии, пренесуваат дел од  грчките медиуми. Мерката има за цел поголема ефикасност на даночните власти и искоренување на корупцијата меѓу нив. Барањето било поставено во доверлив меморандум кој го подготвува тројката. Од овој документ ќе зависи дали Атина ќе ја добие следната транша помош, а ако не се случи тоа Грција најверојатно ќе биде принудена да прогласи банкрот. Според германскиот весник „Ди Велт“, отпуштањата во Министерството за финансии може да се случат и до крајот на оваа седмица. Во исто време ќе бидат назначени 2.235 нови даночни инспектори, со кои ќе бидат склучени договори за три години без право да бидат продолжени.