Мета се обврза да им понуди на корисниците од ЕУ избор во врска со персонализираните реклами на Фејсбук и Инстаграм, со цел да се усогласи со Законот за дигитални пазари (DMA), објави Европската комисија.

Според Комисијата, од јануари 2026 година, на корисниците од ЕУ ќе им се даде нова опција да изберат помеѓу две опции: да се согласат да ги споделат сите свои лични податоци и на тој начин да добиваат целосно персонализирани реклами, или да споделуваат помалку лични податоци, со поограничено персонализирано искуство со рекламирање.

Европската комисија вели дека ова е прв пат ваков избор да се понуди на социјалните мрежи на компанијата.

Комисијата изјави дека, откако ќе се воведе новиот модел, ќе собере повратни информации и докази од Мета и други релевантни засегнати страни за ефектите и прифаќањето на овој систем.

„Корисниците од ЕУ мора да имаат целосен и ефикасен избор, што е нивно право според DMA“, соопшти Европската комисија.

Во април, Комисијата на ЕУ утврди дека Мета го прекршила законот и побара од компанијата да се придржува до прекршените одредби.