Од кабинетот на претседателот, Ѓорге Иванов реагираа со соопштение, во врска со написи во одредени медиуми дека со одлуката на Уставниот суд се укинува и Комисијата за помилување. Оттаму велат дека Комисијата не се укинува и е постојано работно тело на претседателот на Република Македонија. Комисијата за помилување е формирана во 1991 година врз основа на Одлуката за организација и делокруг на работа на Кабинетот на претседателот на Република Македонија. „Комисијата за помилување постоеше и пред донесувањето на измените на Законот за помилување во 2009  и како и досега и понатаму ќе продолжи да функционира како советодавно тело на претседателот. Претседателот Иванов, како и досега, така и во иднина, во извршување на оваа негова  уставна ингеренција ќе се води исклучиво според законите, односно одлуките за помилување ќе ги носи согласно постапката и одредбите од Законот за помилување“- стои во соопштението од кабинетот на Иванов. Од кабинетот велат дека Иванов досега не коментирал и нема да коментира одлуки на Уставниот суд.