Во Албанија околу 22 илјади странци имаат дозвола за престој, од кои 54 отсто се за работа.

Институтот за статистика (ИНСТАТ) информираше дека се проширува спектарот на странски државјани кои пристигнуваат во Албанија заради вработување, спојување на семејства или други мотиви. Најголемиот дел од нив се лица по потекло од Косово, Италија и Турција.

На крајот на минатата година, бројот на странци со дозволи за престој во Албанија изнесува 21,940, што е зголемување од 2,2 отсто во споредба со претходната година.

Од вкупниот број, приближно 12 илјади се поради работа. Мажите претставуваат 61,9 отсто од странците со дозволи за престој, додека жените сочинуваат 38,1 отсто. 

„Најзастапената возрасна група е онаа од 30 до 39 години”, потенцира ИНСТАТ.

Во текот на 2024 година, бројот на лица со потекло од Косово достигна 4,592, што е пораст од 23,7 отсто во споредба со 2023 година, додека бројот на лица со потекло од Италија изнесува 3,763, што претставува зголемување од 11,5 отсто во споредба со претходната година.

Пораст има кај лицата од азиските земји, со 20,1 отсто (4,545 лица), како и од Америка и Африка со 23,4 отсто (3,028 лица).

Вработувањето е примарна причина за издавање на 54,3 отсто од дозволите за престој, а потоа следуваат спојување на семејства со 24,5 отсто, други причини со 16,3 отсто, студии со 4 отсто и хуманитарни цели со 0,9 отсто. 

foto Wikipedia/Chris Walts