Според најновите проценки, во Европската Унија(ЕУ) има околу 2,5 милиони слободни работни места, додека стапката на невработеност е на историски ниски нивоа.

Во таков контекст, сè повеќе се поставува прашањето: Како владите можат да им помогнат на компаниите да најдат и задржат работници?

Структурни причини за кризата

Недостатокот на работна сила во Европа не е краткорочен проблем, туку резултат на долгорочни трендови. Клучните причини вклучуваат стареење на населението, намален број млади работници, но и промени во структурата на економијата што бараат нови вештини.

Европската комисија наведува дека има недостиг на работна сила во десетици професии, а речиси две третини од малите и средни претпријатија не можат да најдат соодветни работници.

Покрај демографските фактори, проблемот е дополнително продлабочен од несовпаѓањето на вештините и потребите на пазарот на трудот, како и неатрактивните услови за работа во одредени сектори, како што се транспортот или градежништвото.

Поголема улога на миграцијата

Една од клучните препораки се однесува на олеснување на пристигнувањето на работна сила од надвор од Европската Унија. Експертите истакнуваат дека Европа ќе мора да привлече меѓународни таленти за да остане конкурентна.

Како што е наведено, поврзувањето на политичките цели со практични решенија - особено преку поефикасни миграциски политики - може да игра клучна улога во пополнувањето на празнините на пазарот на трудот.

Програмите „партнерства за таленти“ и поедноставените процедури за вработување странски работници сè повеќе се истакнуваат како неопходни алатки.

Активирање на неискористениот работен потенцијал

Покрај миграцијата, владите се повикуваат поактивно да ги вклучат групите кои традиционално се недоволно застапени на пазарот на трудот. Ова ги вклучува постарите работници, жените, младите луѓе кои не се ниту вработени ниту се во образование, како и лицата со попреченост.

Европската комисија предлага мерки како што се реформа на даночниот систем, пофлексибилни пензиски правила и дополнителни програми за обука за да им се олесни на овие групи да се приклучат на работната сила.