Војната со Иран ја чини Америка милијарда долари дневно.

Американскиот претседател Доналд Трамп изјави дека војната против Иран ги чини САД околу милијарда долари дневно. 

Трамп додаде дека сака да има улога и во изборот на новиот врховен верски лидер – ајатолах во Техеран.

Тој изјави дека Вашингтон и Израел постигнуваат „историски победи“ во конфликтот, додека борбите се шират долж иранско-ирачката граница и низ поширокиот регион.

Во исто време, израелската армија изврши воздушни напади врз позиции на Хезболах во јужниот дел на Бејрут и ги повика жителите да се евакуираат од областите јужно од реката Литани.

Според извештаите, американска подморница потопила иранска фрегата IRIS Dena во близина на Шри Ланка, додека системи на НАТО пресретнале иранска балистичка ракета насочена кон Турција.

Азербејџан ја подигна борбената готовност на својата армија откако беспилотни летала паднаа во близина на аеродромот во автономната енклава Нахичеван. Претседателот Илхам Алиев побара од Иран да се извини за инцидентот, иако Техеран негира дека стои зад нападот.

Во Кипар, властите соопштија дека е укината тревогата по безбедносен инцидент во селото Акротири, во близина на британската воена база RAF.