„Ние донесовме одлука да испорачуваме 100 проценти енергија во 2022 кон ЕВН ХОУМ и тоа значи дека оваа компанија нема да набавува дополнителни количества енергија кои на берзата се со повисоки цени. Така нашата компанија и натаму ќе остане стабилизатор на цената за домаќинствата и малите потрошувачи. Очекуваме во наредните денови Владата да донесе таква одлука, да препорача цена и веќе до 9 декември, до кога е отворениот повик на ЕВН ХОУМ да доставиме официјална понуда и да почнеме подготовки за реализација на планот за 2022 година“, изјави Васко Ковачевски, генерален директор на АД ЕСМ.

Тој истакна и дека за оваа грејна сезона ги прават сите напори сите нивни капацитети да ги стават во функција. ТЕЦ Неготино ќе почне со работа до крајот на декември и ќе работи до април. Во функција ќе биде ставен и трансформаторот на третиот блок, чија санација оди побрзо наместо предвидените шест месеци.

„Во РЕК Битола наскоро, до крајот на месецов, во функција ќе биде ставен трансформаторот што беше опожарен, а потоа ќе продолжиме со работа на трите блокови на РЕК Битола. Во изминатите неколку денови е ставен во функција и нашиот капацитет РЕК Осломеј, работи со максимален капацитет и тоа значи сите наши капацитети ќе бидат ставени во функција и ќе произведуваат електрична енергија“, рече Ковачевски. 

Инаку, ЕСМ очекува Владата да донесе одлука со препорачана цена на електричната енергија и веќе во четврток, кога и истекува рокот на ЕВН Хоме, да достават понуда. Владата на затворена седница ќе го разгледува финансискиот и планот за производство на државните електрани за 2022 година.

Како што е познато, на средбата на премиерот Зоран Заев со лидерот на Алтернатива Африм Гаши, еден од условите беше да не се зголеми цената на струјата за повеќе од 20 отсто.