Голем раст забележа економијата на Тајван поради бранот на извоз на чипови.

Статистичкиот завод на Тајван во петокот објави дека третиот квартал донесе раст од 8,21 проценти во споредба со истиот период од претходната година, првенствено благодарение на растот на извозот од дури 36,5 проценти. Вториот квартал веќе беше силен со раст од 7,7 проценти. Во октомври, извозот порасна за речиси 50 проценти, што е најголем месечен скок за повеќе од 15 години.

Островот, кој Кина го смета за своја територија, постигна раст од околу осум проценти два квартала по ред, што е исклучително ретко за развиените економии. Прогнозите покажуваат дека растот на БДП во 2025 година би можел да достигне околу 7,4 проценти, повеќе отколку во континентална Кина, објавува CNN.

Берзата во Тајпеј ја престигна Германија во септември и стана осма по големина во светот, поттикната од глобалната експанзија на вештачката интелигенција. Сепак, иако економијата е во подем, многу граѓани не ги чувствуваат придобивките, бидејќи разликата во приходите расте, а платите стагнираат. Причината е што растот е исклучително концентриран во еден сектор - електрониката, која сочинува повеќе од 15 проценти од БДП, но вработува само околу 6,5 проценти од работната сила.

Ова влијае на потрошувачката, која останува слаба, а довербата на потрошувачите е ниска во текот на целата година. Трговските војни иницирани од американскиот претседател Доналд Трамп дополнително го намалуваат расположението, особено затоа што Тајван сè уште не склучил трговски договор со САД.

Тајван е меѓу најголемите добитници на глобалната експанзија на вештачката интелигенција. Благодарение на децениското искуство во производство на чипови и електроника, тајванските компании се во центарот на глобалната побарувачка за графички процесори и сервери потребни за обука на модели со вештачка интелигенција, пренесува biznis.rs.

foto freepik.com