Наташа Пирц Мусар стана првата жена претседателка на Словенија

Наташа Пирц Мусар во вториот круг од претседателските избори во Словенија го победи својот противкандидат Анже Логар. „Сакам Словенија да стане земја во која младите ќе сакаат да останат“, изјави Пирц Мусар, која е активна на социјалните мрежи, иако има многу помалку следбеници од нејзиниот претходник. Новата претседателка е адвокатка, сопственичка на три компании и собира фигурини од бувови, кои и се допаѓаат бидејќи симболизираат мудрост.

Наташа Пирц Мусар е првата жена претседателка на Словенија, а целта ја постигна без партиската инфраструктура која го поддржа нејзиниот противкандидат. 

#Volitve Hvala! pic.twitter.com/rWendWlQsO

— Nataša Pirc Musar (@nmusar) November 13, 2022

Родена е во 1968 година во Љубљана во работничко семејство. Детството го поминала во Камник, а сега живее во Радомље. Дипломирала на Правниот факултет во Љубљана во 1992 година, а 23 години подоцна докторирала на Правниот факултет во Виена. Првата работа и била на националната телевизија, а по шест години се преселила во ПОП ТВ. Во јули 2004 година, Националното собрание ја избра за прв пат за комесар за информации, а вториот петгодишен мандат на оваа позиција го заврши во 2014 година. Оттогаш таа се занимава со адвокатура. Како и Борут Пахор, таа е активна и на социјалните мрежи, иако има многу помалку следбеници од него. На Твитер има повеќе од 54.000 следбеници, речиси половина од претседателот во заминување и 2.209 на Инстаграм, што е 60 пати помалку од Пахор. Дома има две чивави и колекција фигурини од бувови кои ги собира веќе дваесет години. Пирц вели дека ја сака оваа птица бидејќи е симбол на мудроста.

Нејзините хоби вклучуваат играње боче и возење мотоцикли. Има 273.000 евра банкарски заштеди и финансиски вложувања, поседува 145 акции „Крка“ по курс од петокот вредни нешто повеќе од 62.000 евра. Сопственик е на три фирми (Адвокатска канцеларија Пирц Мусар и Лемут Стрле, Инфо куќа, Руска дача), вкупната книговодствена вредност на акциите е 212.000 евра. Таа е и косопственик на семејната куќа во која живее со сопругот Алеш. Алеш Мусар се збогатил на почетокот на приватизацијата на државните фирми, но Наташа Пирц Мусар тврди дека целото богатство е заработено чесно и законски. Тие го имаат синот Макс, кој е студент по машинство. Од неодамна живеат во Радомље, на северот на Словенија

Овие претседателски избори се седми во историјата на независна Словенија. Милан Кучан беше претседател во два петгодишни мандати, по него со Словенија претседаваа Јанез Дрновшек и Данило Туерк, а потоа во два мандата Борут Пахор.

Фото: Youtube - screenshoot/Tviter