Цената на златото продолжува да руши рекорди. А главната причина е масовното купување од страна на централните банки.

Сепак, анализата на „Фајненшл тајмс“ покажува дека „рекордната“ побарувачка може да се базира повеќе на проценки отколку на факти.

Европската централна банка (ЕЦБ) објави во јуни дека централните банки учествувале со над 20 проценти во глобалната побарувачка за злато во 2024 година. Тоа е двојно повеќе отколку во текот на 2010-тите.

Сепак, кога ќе ги погледнете официјалните податоци, ќе видите дека ситуацијата не е баш таква. Имено, централните банки ги зголемиле своите резерви на злато за 228 тони во изминатата година. Тоа всушност спаѓа во долниот квартил на купувања во последните 5, 10 и 15 години.

Непријавени купувања

Тогаш зошто да зборуваме за „невидена побарувачка“? Одговорот лежи во таканаречените непријавени купувања.

Кога ќе се додадат на официјалните бројки, вкупните купувања од страна на централните банки скокаат на дури 804 тони.

Што се „непријавени“ купувања? Официјалните податоци за резервите на централните банки доаѓаат од ММФ, но известувањето е доброволно. Некои земји, како што е Русија, престанаа да известуваат дури и пред да бидат воведени санкциите, иако е познато дека биле големи купувачи во тој период.

Затоа аналитичарите и ЕЦБ се потпираат на проценките од Светскиот совет за злато (WGC), здружение на рударски компании чија цел, меѓу другото, е да го промовираат златото. Од 2014 година, WGC користи податоци од независната консултантска компанија Metals Focus, која ги проценува вкупните нето купувања на злато од страна на централните банки и суверените фондови за богатство.

Како што самите признаваат во својата методологија, „со оглед на недостатокот на транспарентност на пазарот, статистиката за понудата и побарувачката треба да се смета за проценки - некои поточни од другите“.

10.000 долари за унца

Златото можеби сè уште сјае како безбедно засолниште во време на криза. А Џејми Дајмон од JP Morgan можеби е во право кога предвидува дека скапоцениот метал би можел да достигне 10.000 долари за унца. Но, приказната за рекордното купување од страна на централните банки е понијансирана отколку што изгледа.