Мермерен комбинат од Прилеп е една од компаниите кои се афектирани од глобалната пандемија, но сепак и покрај падот на приходите и профитот, успешно се справуваат и работат успешно. Да успешно! Затоа што од вкупните приходи од продажба на нето добивка останува речиси половината

Мермерен комбинат Прилеп е „позитивен“ на корона исто како и многу домашни компании кои се директно зависни од случувањата на глобалните пазари. Но и во вакви кризни услови компанијата има одлични резултати особено се истакнува профитната маргина во која добивката е речиси половина од приходите од продажба.

За првите девет месеци друштвото има продажба од 15,9 милиони евра и тоа е за 33 отсто во споредба со истиот период лани. Домашниот пазар иако учествува малку во структурата има голем пад во однос на лани. Приходите од домашниот пазар се само 113.000 евра што е за 64 отсто помалку. Приходите од извоз на македонскиот мермер изнесуваат 15,8 милиони евра и се за една третина помали од истиот период лани. Но и покрај тоа друштвото стопанисува и повеќе од успешно во овие специфични услови.

Бруто добивката за девет месеци изнесува 10,7 милиони евра и е за 39 отсто пониска од истиот период лани. Најголема трошковна ставка се исплатите за вработените кои за девет месеци изнесуваат 2,9 милиони евра во бруто износ и се за 8 отсто пониски од првите девет месеци лани. Трошоците за вработените укажуваат на мал, но постоечки намален обем на работење на друштвото. Трошоците за суровини и материјали се на исто ниво како и лани поточно зголемени се за 2 отсто и изнесуваат 2,6 милиони евра. Во овој период значаен раст на трошокот за амортизација кој изнесува 1,7 милиони евра и е за 30 отсто повисок од лани.

Нето добивката на друштвото изнесува 7,5 милиони евра и бележи пад од 44 отсто во споредба со лани.

Прилепскиот Мермерен комбинат во нашата инвеститорска јавност е популарен и имам имиџ на компанија која знае да ги зарадува акционерите со дивиденда. Последната одлука за дивиденда ја донесе во септември кога исплати 8 милиони евра.

Прилепската компанија, најголем македонски производител на мермер, е во доминантна сопственост на две странски правни лица. Мнозински сопственик е холандската компанија за производство и продажба на мермер „Стоун Воркс Холдинг Кооператиф“ која поседува 89,25 отсто од акциите и грчката „Пиреус банка“ која како старател управува 10 отсто од акциите на компанијата. Останатите околу 35.000 акции со право на глас се сопственост на осумдесетина домашни акционери физички лица.